Բարուց և չարից անդին

Վաղուց չեմ փնտրում 

Կեանքում իմ տեղը,

Ու նաև դերը,

Այն էլ գլխավոր.

Ես դերասան չեմ,

Արևից բացի ոչ մեկի սան չեմ:

Ինչու՞ են մարդիկ

Ձևականության իրենց թատրոնում

Իրենց տեսնելով գլխավոր դերում

Իրենց ճաշակի քմահաճույքով

Այլոց համընկնող դերեր սահմանում,

Հետո զարմանում, հետո զայրանում, 

Որ այս այսինչը

Իրեն շնորհված դերը վատ խաղաց:

Ինչու՞ են մարդիկ 

Դեր բաժանելու իրենց մոլուցքում

Դեր են հատկացնում

Մինչև իսկ Աստծուն:

Ու երբ այդ դերը Աստված չի ստանձնում

Այդ «դժվար» դերը իրենք են խաղում

Եւ աղավաղում...